كذا كذا..... أبو راشد العواضي

 يقول أبو راشد العواضي 

كذا كذا والا على الدنيا السلام

نظهر وتظهر للجميع فروقنا

—

حنا كذا خلقه قليلين الكلام

الا ليامن عوّدت لحقوقنا

—

عهودنا لا تستباح ولاتسام

لو الرماح مسدده بحلوقنا

—

باقدامنا ناطا على روس الهوام

وجباهنا يم السحاب تسوقنا

—

لو نجتمع نفرق حسام من حسام

ولو نفترق مافيه شي يعوقنا

—

ولو تلتفت هاماتنا صوب الغمام

حتى السحابه ماتجي من فوقنا

—

فاللازمه لا نستريح ولا ننام

مثل الذيابه ما يغمض موقنا

—

نشوش لا شاشوا عزيزين المقام

واللي يشوق الطيبين يشوقنا

—

والا وانتخن فينا حشيمات اللثامً

نفزع ويطبخ دمنا بعروقنا

—

ومن الكرم نمشي ولو عكس النظام

ونساعد المحتاج لو بيبوقنا

—

من قبل نفسه لاتحده للحرام

نخيّره بـ شياهنا وبـ نوقنا 

—

تاريخنا ماهو حصيلة كم عام

فعولنا تغنيك عن منطوقنا

—

عزالله اللي مدحنا مايلام

وان ما مدحنا .. مايطيّح سوقنا

سلامي واحترامي وتقديري للجميع

الشاعر أبو رأشد العواضي