اللي باقي قصير.
عبدالله رجب ابوعدنان
لأول مرة اديا ترتعش
واحلامي تتفرط و تنكمش
وحاجات جوايا
كانت متفقة
دالوقت بتختلف
نفسي اضحك ومش قادر
والدمعة شلال هادر
قلوب قلبت على محاجر
ومن الكلمة الحلوة بتتكسف
ودنيا بالكدب عايشة
وعيون الصبية زايغة
ونفسي مني تايهة
وطريق الحرمان بيترصف
وبعض أوراق قديمه
زي ما يكون ليها قيمة
مع كوباية شاي تقيلة
توزن الدماغ من السخف
وناس من جوه فاضية
بتعيش على أوهام ماضية
ودمعتي لما بتنزل بتكون حامية
من الكبر و التكلف
ونستلف أحزان لبكرة
خلاص طوقنا رقبتنا بالحسرة
أبو قرش ساغ بقى بعشرة
حتى الطيبة بتتنسف
اللي باقي قصير م العمر
يدوب فركة كعب
نص حلم خايب
وربع غدر
وربع مر
وحضن ليه العجب
من برة بارد
ومن جوا لهب
والعقد خلاص بيكر
وما باقي إلا شوية
كرامة على شرف
اللي باقي قصير..
عبدالله رجب ابوعدنان
ليست هناك تعليقات:
إرسال تعليق