إهداء لكل الأمهات و خصيصا لأمي الغالية بمناسبة عيد الأمهات
سامجيني يامّا
سامحيني يامّا
سامحيني يامّي
سامحني ممّا
Pardon maman
Excuse me mother
Pardone madre
بكلّ اللّغات وكلّ اللّهجات
اليوم بنيّتك طالبة السّماح
علّي تعدّى و اللّي فات
اميمتي الغالية سامحني نحبّ نرتاح
هايمّا سامحي بنيتك
طفلة صغيرة مهما كبرت
ولازم ترجع مهما بعدت
و مهما بعّدت بينا الأيّام
يبقى اسمك في فمّي أحلى كلام
وتبقى ديمة في بالي ميمتي الغاليّة
الشّمعة اللّي مضويتلي أيّامي و لياليّ
اميمتي الغالية
حبّك مرسوم في زندي و إيدي
و دمك يجري في عروقي و وريدي
ولا يعوّضك حتى حد
لا بنتي ولا راجلي ولا وليدي
اميمتي الغالية
نجمتي الضّواية
متوحشتك و انت معاي
و لو نعدّي معاك نهاري و ليلي
عمري مانشبع منّك
و لا نشبع من طيبتك و حنّيتك
امّيمتي الغاليّة
يا أغلي ما عندي وضي عينيّ
متغشّشة على روحي
و ع الضروف اللّي بعدتني عليك
و خذاتني منك
لو نفرشلك الأرض ورود
و لو نهديلك أغلى مافي الوجود
نبقى ديمة مقصّرة معاك
خاطر شي في هاالدّنيا أغلى منّك
و كنوز الدّنيا كلّها ماتوفّيك حقّك
خاطرك أنت دنيتي كلها
و إنت أغلى مافي الوجود
أمّيمتي الغالية
نظرة من عينك تكفيني
و دعوتك ليّ بالخير تكفّيني
أنا اللّي عمرها الكلمات ما خانتني
اليوم لقيت روحي عاجزة
نلوّج عل الكلام و الحروف
لا قادرة نتكلّم ولا نسمع و لا نشوف
امّيمتي الغالية
بنتك هايمة و تعبانة
و في هاالدّنيا تايهة و غلبانة
الدنيا مرمطتها و مرثت بحالها
ونزعت عليها الفرحة وراحة بالها
و قلبها صار معشّش فيه الخوف
امّيمتي الغالية
نتمنّى نرجع طفلة صغيرة
نرمي روحي في شونك و في حضنك
و نحكيلك علّي واجعني و متعّبني
نشكيلك من صاحبتي اللّي فكّتلي كراستي و مسطرتي
و من بنت الجيران اللّي وقت اللّي جات بحذاهم بنت الخالة
نساتني ،طفّاتني و حقرتني
نشكيلك من معلّمي اللّي في القسم ديمة يضربني و يعاقبني
خاطر ديمة يلقاني نرسم
عوض ما نتلهى بدروس اللغة
نحو و صرف
اسم و فعل وحرف
تعرفي يامّي في شنو نرسم؟
نرسم في صورتك يامّي
صورتك يامّي اللي عمرها ما تفارقني
امّيمتي الغاليّة
جيتك اليوم و الدمعة في عينيّ
كل همّي إنك تعدّيلي زلّاتي و هفواتي
صحيح قليلة زياراتي و تلفوناتي
لكن اللّي في القلب في القلب
مهما خذاتنا الدّنيا
و بعدت عليك ليالي ووأيّامات
يبقى حبك هو الحب الوحيد اللي في بالي
ساكن في قلبي و روحي و جواجيّ
يا أمّي العزيزة عليّ
يا روح قلبي و قطعة مني
أمي يا أغلى هدية
منّ بيها المولى عليّ
يا أمّي العزيزة عليّ
يا امّينتي الغاليّة
نهلة دحمان الرقيق
السبت 27/05/2023
ليست هناك تعليقات:
إرسال تعليق