حكاية الفيل والفيلة
الفيل ضرب الفيلة
وقالها سيري لدار باك
بغيت نبدل العتبة
وعلاش لا حتا لقبيلة
ونجيب وحدة تكون ليا خليلة
يتفاجا بيها لقلب
وتداوي كل عليلة
قالتلو هذا هو المضنون فيك
ياولد العيلة
هاذي راه عشرة سنين واعوام
ماشي غير عشرة ليلة
ولا حيث لقيتني صابرة وراضية
قلتي هادي غير هبيلة
قالها انا بغيتها رشيقة وجميلة
عود الند ولعود الخيزران مثيلة
ماشي لي تاكل ماتعقل كيف الغولة
وتلحس حتا لكدور بنهار
وبالليل تقلب تشرب الشايط من الحريرة
قالتو حتا تكون انت بعدا شمعة
عاد قلب على لفتيلة
ولا صافي ولا يبالك راسك بوكوص ونحيلة
ولا تقلبو ليك الموازن
مابقيتي تعرف دروك من كبيلة
قالها اييه معاشرة من والا تورث البالا
وغادي نولي غزال الا عاشرت غزيلة
ما تاكل بزاف ماتقولي جيب جيب
وترضى غير بالقليلة
قالتلو ايوا سمع ياقزيبير فسليلة
انا بعدا تناكل غير فرزقي لي مكتبلي ربي
وراضية غير بخبيزة وبصيلة
ما مكلفا عليك لا شوا ولا بسطيلة
اما هي من قلبك تاكل فيك بحال الرتيلة
مسومة ما تعرف طريق لفضيلة
فلوسك تخسرهم فالخوا الخاوي
لي جمعتيه فعام تخسرو ليك فليلة
تقتلك غير بالسم والشك
وتعيش معاها ونفسك ذليله
حيث الفيل ما تليق بيه غزيلة
والا كبرتي وهترتي وقلالت ليك الحيلة
تخليك وتقلب على غيرك
وتعيشك الغبن و التبهديلة
وما تلقا ليك بديلة
اما انا بنت الناس مانفرط فيك
منك وعليك أصيلة
قلبي طيب وكبير ،صبارة
ونهز كل من هي ثقيلة.
راه ما تبدل صاحبك غير ما كرف
والزين لازين لفعال
مابقات لا فرقيقة ولا فطويلة
ولبس قدك يواتيك
راه الفيل ما تقبل عليه غير فيلة.
امال بن الغزايل
ليست هناك تعليقات:
إرسال تعليق