اعتذار
بقلمي يحيى حسين
بعد ما هدمتى بإيديكى
اللى باقى من جدار
بعد ما شفتى في عيوني
نظرة شوق و انكسار
بعد ما رويتي الأمانى
بدمع بطعم المرار
جيتي وأخدتي القرار
ملفوف بكلمة اعتذار
قد إيه النسر قاسي
لما بيعدى الجسور
ويرمي بشباكه اللعينة
فوق أعشاش الطيور
ويقتل أحاسيس جميلة
كانت جوه الصدور
لكن النسر عمره
ما أدعى نبل القرار
وجه يواسى الطيور
قال بكلمة اعتذار
قلبي بحبك أو بغيره
حيفضل مليان بالحنين
قلبي حيفضل تمللى
يتحدى تعب السنين
قلبى حيفضل يدور
قلبى حيفضل جسور
دا إنتى يدوب فى حكايتى
حرف . من بين السطور
قلبى خلاص أخد القرار
إنه رافض حتى منك
إي كلمة اعتذار
يحيى حسين القاهرة
6 ديسمبر 2018
ليست هناك تعليقات:
إرسال تعليق