عايز اعيش
عايز اعيش لا عايز قصر ولا بقشيش
عايز اكل لقمة عيش إزاي ؟ وانا ممعيش
يرضي مين ياناس وازاي نقدر نعيش
يادوب ناكل فول وطعميه ورغيف عيش
والعدس مين يقدر عليه بقى ب ٥٥ جنيه
خلاص نسينا الفراخ واللحمه والشيش طاووك
والهوت دوج والسوسيس
حتى الخضار أورديحي بقى ب ١٠٠ جنيه
قولنا نجيب بطيخه وحته جبنه ورغيفين عيش
ضلمت الدنيا في عيونا لقيناهم ب ٢٠٠ جنيه
رد علينا وقول يابيه نعمل إيه وناكل إيه
والمرتب يادوب مصروف يومين
بعد الايجار والنور والميه والنضافه
وهيا فين النضافه والزباله وسط الميدان
وعلى ناصية الحاره وكل شارع وجنب الجُدران
والكلاب كبرت وبقت زي الخرفان
بتزاحم الناس في كل مكان
والحر زاد والمروحه باظت ونجيب فلوس منين
والرؤيا بقت ضباب ونسمع زعيق الغراب
ونصحى كل يوم على نهيق الحمار
اصل العصفور ساب عشه وطار
يعمل إيه الحق مش عليه
كان عايش بحبايه واحده بتكفيه تشبعه وتغذيه
قالوا لا حبايه كتير عليه قسّموها
سابوله الربع واخدوا الباقي
وقالوا العش كبير عليه
فاضي زي الصحرا عايزين يعمّروه
جه الريح اخدوا وطار
وكل يوم نسمع كلام وكل مره نقول الله
راح يروح الظلام والنور في يوم يبان
لقينا الغربان جت سكنت المكان وزاد الغيام
والعيون مش شايفه غير الضباب
ابراهيم محمد آدم
ليست هناك تعليقات:
إرسال تعليق